Un fermo immagine di "Bellissima"
Milano, 26 ottobre 2017 - Ciulà se dovariss scriv ciollà, ma ona volta tant lassem perd la grafia e pensemm all'effett comic. El vacabolari del Vallardi el dis “Possedere sessualmente”, ma anca “ Ingannare, Truffare”. El me “Gran liber di parolasc” el spiega “copulare”, ma sotta “ciolla” el mett la didascalia “stupido, pirla”. L'autor el dis che el se usa anca come intercalare. “Sont andà al cinema” “Ciolla! (detto con meraviglia e con una l sola) “ Hoo vist la Bellucci” “Ciolla” (detto con invidia) “L'è ancamò on bel tocch de…” “Ciolla” (interruzione voluta) “ su no se la ciolla… però che gno…” “ciolla!”(seconda interruzione voluta). Peu gh'è el termine, in ordine alfabetico, ciollada, che l' è no come pensen i malnatt on atto sessuale ma la gh'ha el sens de bozzarada (buggeratura). Perché sto incipit iscì longh Perché l'è el moment di confession a tutta pagina. Celebrità e fra pocch anca gente comune, che proclamen a front alta de vess stàa obbligàa a dass via per ona scrittura. E tutt quest a distanza de ann. E adess gh'è la corsa a chi l'ha patì più volte. “Anca mi, anca mi”.
Comincen semper all'ester, insema ai dottor che fan pubblicità del viagra, del cialis, di pillol per l'erezion, che vegnen tucc dai Università de la California, del Texas, del Missouri. Aveven comincià cont la storia dei “cento medici americani su cento consigliano il dentifricio Colgate che el fa andà via la patina, che imbianchiss i dent, che preserva dalla carie, che quand te baset il o la partner te ghe lasset in boca el savor de menta, che l'è propri de lì che l'è nassù el detto “fate l'amore con il sapore” . “Anca a mi el produttor, el regista, l'attor, el macchinista, el portaceste, m'ha obbligà a fa di robb che me vergogni fin a dill.” E dai, cont ona bella confession che i settimanal se divertissen a pubblicà. E dai cont i morbosità che vegnen a galla, narrazion con tutti i particolar, se sa no se hinn cuntà per risveglià el desideri e dass de fa cont el sesso per peu fra ona vintena d'ann dì che el gh'era minga piasù, che chi gh'aveva fa i propost oscène, i puttanad (vedi oscenità sul voc. italiano/milanese) a l'era on moster e che la scena l'era degna del famos musical in doa lèe l'è Bella e lù 'na Bestia.
Adess me daran del maschilista, del pervertìi, dell'omm insensibil e crudel, senza coeur, senza remission. Ma le savevom giamò che tutt el mond el ciollava. Le savevom giamò che in del cinema gh'eren i omen cont i man a tentacol. Basta regordass del film Bellissima cont ona memorabile Anna Magnani in doa Walter Chiari el tenta come tenten tanti nel “sottobosco del cinema”, per capì come ona dona la po' vess bersagliada, casalinga o starlette che la sia. Ma, hann imparà nient da quell che l'è vegnù foeura da la via Olgettina I e ciamen scandali e gh'è chi fàa de tutt per confessas pubblicament. Chissà se dopo sti confession se creden in Grazia e coren a fa la Comunion E i omen La dignità, certi, san nanca doe la stà de ca'. Mi conossi gent che la dorma sotta i pont, in di andron, sui pianerottol de ca' de ringhera, in di stall, in mezz a boscaj sporch e pien de pericol, in mezz ai maceri di fabbrich vecc e foeura de rigol, e ciammen no la television e la radio e facebuuk e instagramm, che ona volta esaurida la notizia van via e tornen pù. Se ne stan quiett, se lamenten magari in alto loco, sann giamò che i fiammad se smorzen cont on boff, e seguten a domandà la carità davanti ai ges, ai supermercàa, o a laorà al mercà ortofrutticol, a scaregà cass dai containers, a nettà veder, a fass vegnì in ment, e chi torni al frances, escamotage che comprenden anca sacrifizi.
I debit chi ghe n'ha no in 'sto moment L'è vera. Gh'è gent, specialment nel cinema, nel teater, nella television, che sembra piena de danèe. Poeu salta foeura che gh'han pignoràa anca i mudand. Investiment sbagliàa, bolgir (truffe), gabol, spes foeura de misura, robalizzi (furti) , prestit mai dàa indrèe, vizi del gioeugh, del fumm, de la canappia, regai sproposità, donn mangiadanè, fioeu foeura de testa, concession , amant e a la fin …la confession. E se te set stàa abbastanza birbant te gh'et el premi di primm pagin, di servizi sui gossip compres de copertina, fòrsi ona quai partecipazion televisiva, on Costanzo Hit, ona convocazion per fa' part d'on programma de la De Filippi, e se te intrighet i to' affann cont ona specialità de la cusinna (busecca a la periferica, cassoeula a la contadina, less al gorgonzoeula, cervell all'onorevole) te metten cont la Clerici visin a on quai chef che quand el spadella el par nissun, quand el va' in sala a ciappà il plauso dei commesal, el sembra on Re, on President.
Mi voeurevi parlà d'alter ma me sont fa ciappà la man dai polemich, da la gente che sparla, da i porter che disen ad alta vos i lor parer, dai negoziant de frutta e verdura che roben sul pes, dai student che fumen e spinellen, dai riccon che tiren, dai mecenati che gh'hinn pù e se ghe ne vun ghe salten addos in cent giusta per fall scappà via, da chi piang senza reson perché l'ha mai avu dalla vita quel che l'ha semper desideràa, dai ball che cunten personagg destinàa a cuntà ball, dai progett che stan in del cassett perché gh'è pu specializzazion e nissun el fa domà el so mestèe ma el voeur entrà in quell di alter. E tucc che canten, che scriven liber, che improvvisen, che organizzen, che fann i volontari o mej che disen del fa', che roben, che fann i week end, che mangen, che ciollen e peu se pentissen e se confessen pubblicament.
El me diseva on prèt l'alter dì quand gh'hoo domandà chi l'è ch'el confessa tutta la gent che la domenega la fa la Comunion ( quasi tucc e a tutti i mess, tant che di volt finissen anca i particol). “ Minga tucc se confessen. Fan on pensierin in Alt, se convincen de no vess in peccàa mortal e se conmunichen. Del rest adess el mestèe del pret l'è in ribass anca in di confession. Gh'è el psicologo del settimanal, el confessor de la television, el giornalista conduttor d'on programma, quell che el dev strappà la verità all'intervistàa, la titolar de la titolar de 'na rubrica gossip, quella che la domenega dopo mezdì la confessa nel piccolo schermo, e i chiromant, i cartomant, i magh. La gent la parla, la ricorda, la se libera dell' amàr. E i amor, e la finanza, e i amis, e el food. Purghèm pubblicament i noster peccàa e peu andem a mastegà i obbiaa (ostie). Gh'è gent che la fa andà i ganass come se la gh'avess in bocca ona michetta. E te la vedet foeura pronta a di' la soa senza pudor, senza ritegn. E la soa voeur dì criticà el contenuto de la confession pubblica, minga de falla foeura del confessional. Ma per quest gh'è “el grande fratello vip”. Quatter paret, la quinta l'è la telecamera, nissun attorna, domà 2 milion e pussèe de teleascoltador, e … “gh'hoo di robb de dì”. Al mond. brivio.roberto@yahoo.it