e Fabio Wolf Se sa che el nost Milan l’è pien de magia, basta pensà a i Re Magi, a la...
e Fabio Wolf Se sa che el nost Milan l’è pien de magia, basta pensà a i Re Magi, a la colonna del diavol o a la grata impossibile de piazza S.Sepolcro, ma stavolta Milan el diventa el center de la magia internazional cont on spettacol grandios, el “Festival della Magia”, voluu, dirett e presentaa del poliedrich Raul Cremona, generos amis di Duperdu e de la nostra stralunada compagnia Minima Theatralia. El Raul, meneghin doc, el descend de ona famiglia de circens e l’ha cominciaa de bagaj a fà l’illusionista insema a sò pader. In di ann ‘80 l’è al Derby Club cont el Paolino Rossi, el Brivio e l’Aldo, il Giovanni e il Giacomo e poeu al Ca’ Bianca indove el cognoss el Lauzi, el Valdi e el Svampa. In del ‘97 el debutta a “Mai dire gol” e el diventa ona star del programma. L’è on brav magh, ma la soa intuizion genial l’è stada quella de mett insema magia e comicità cont el sò cabaret magico, indove el se trasforma in di sò personagg improbabil, l’Oronzo, el Silvano, el Manipolini e tanti alter che hann faa scola fin de i primm temp del Zelig televisiv. Al Teatro Manzoni l’è in scena fin a l’Epifania quest’ immens Festival de la magia, l’è la soa settima edizion e la promett ona serada mirabolant, la regia l’è del Carlo Negri, cont artista de ogni part del mond: Mag Edgard, Carillon, Circo Roncalli, Nestor Hato, Nick Blaze e Dion in fra i alter. A trà insema tuttcoss, la simpatia e la bravura del Raul Cremona, che, per ona sira, el farà el magich conduttor, e allora? Cossa spettom a fass brascià de l’illusion?