El mond noeuv al Binario 7

Marta M. Marangoni e Fabio Wolf

Incoeu ve portom on poeu pussé in là de Milan, tocca andà fin in del fond del Fulvio Testi e ‘rivà a Monza, in piazza Castello, per trovà on post meraviglios. Nassuu in del 2005 denter on palazz futuristich de stil razionalista del 1934, firmaa de l’architett Carlo Putelli, l’è diventaa on “polo” cultural de primm pian in la cittaa, el Urban Center, mej cognossuu come Binario 7. El comun de Monza l’ha affidaa la direzion artistica a on fioeu de la cittaa, el sopraffin regista, attor e drammaturgh Corrado Accordino, nassuu in del ‘70 e in su la scena fin del 1989 de fiolitt. L’è staa co-direttor del Filodrammatici e del Libero e chì, in del spazzi de Monza, el diris doo sale teatrali insema al fenomenal Elio De Capitani e ona scola de formazion per i attor insema a l’Alfredo Colina. Propi in la sala pussé granda, la Sala Chaplin, cont quasi tresent post, l’è in programmazion l’ultima fadiga de l’Accordino: “Il nuovo mondo”, ispiraa al liber del visionari Aldous Huxley, ona storia che la vegn del passaa per parlà del noster futur. La felicità apparent del consumism, indove se perd la nostra libertà, on pass a la volta. El spettacol l’è ona immersion in d’on mond noeuv, el temp se sospend e el pubblich l’è scaraventaa da i attor in d’ona realtà parallela, in d’ona alterazion psichedelica. L’è propi l’ora de partì per ‘sto viagg in d’ona dimension sensorial inedita, per andà a cercà la nostra anima, se la gh’è ancammò!