I Legnanesi
Milano, 2 gennaio 2020- I Legnanes. Da duu ann al Teater de la Luna de Assagh. Duu mes e on quaj di de esaurii. Me par la sia l’unica compagnia italiana a longa tegnidura. Certa gent la dis ch’ el fenomeno l’è spiegabilissim: “l’è el pubblic special che gh’hann lor” “l’è fortuna”, “fa el pien l’è come vinc on bigliett de la lotteria e lòr gh’hann cù, le vincen semper”. Certo che a fa’ di calcol se fa’ prest. On total de 60.000 spettator, sommà a tucc quej che fann in del tour, beh se l’è minga on fenomeno da conferenza?!
Che i criticon la capissen ’na bona volta. E la gent, stufa dei tiramolla italian, de sentiss adoss la responsabilità de mandà avanti on paes, de senti parlà di tass che diminuissen e che inveci aumenten, de vedè on governo che come el precedent litiga tutti i dì e magari le fasess in manera costruttiva, de sentiss addos el tajon di elezion, el fa’ anca rima, la gent, disevi, la decid de vorè ridd e la va a cercà quej che, travestì per segutà on usanza oratorial che la risal ancamo’ al ‘600 e rotti, sann de ottegnì la ridada, con i battud, i costumm, i stori, l’esagerazion e i scènn de carta che calen dell’alt, i siparietti veggia manera, la passerella usada cont sapienza in ògni entrada de rosc, sfarzosa e tipica de la veggia rivista. Quest’ann gh’era el problema de la sostituzion del Gioann. I corvi hann comincià giamò da l’ann passaa quand l’è cominciada a girà la vòs.
Provasio e Dalceri hann dimostraa che el detto “morto un papa se ne fa un altro” l’è ver e se po’ applicà de per tutt. El nomm, la fama, la cjamada, el simbol “I Legnanes”, el gh’è. Consolidaa in 70 ann de militanza nel mond de la ridada; l’amor del pubblich el s’è vist all’anteprima. Quand l’è entrà el Gioann gh’è sta’ a l’inizi on refrigerament pien de dubbi. A la prima battuda on moment de perplessità:”Gh’ho de ridd o foo el sostegnù?”. La vicenda leonardesca, e chì l’è stada la pensada magica di duu autor (Provasio e Mitia del Brocco) la gh’ha da’ al pubblich la distrazion de ‘na trama, anca bislacca se voeurom, ma la bislaccheria alta e professional fa’ part del bagali di Legnanes. L’è nassù el Gioann. Incert, con tanta paura, ancamò minga belva… ma el gh’a, cont el sostegn del Provasio regista, la possibilità de fass come el s’è fa’ l’alter. Compagnà naturalment da la Mabilia (Enrico Dalceri (scenografo e compositor) poeu da Francesco Pellicini (Michelangelo), Danilo Parini (Pietro), Giovanni Mercuri (Leonardo), Maurizio Albè (Carmelo) Franco Cattaneo (Gioconda), Maicol Trotta (Salai), e Quercia (David, Rosina), Rondena (Isabella d’Aragona) Fenocchio (Gendarme). La Teresa (Antonio Provasio) l’è on comic de poltronissima.