Bona Pasqua a tucc, anca a queij che hinn no su la “mailing list”

Milano, 16 aprile 2017 - Bona (pron.buna) Pasqua. Per la verità me secca on po’ quel Bona. El par, scritt, on aggetiv romanesk! Per de pu bona(pron.bona) nel sens de bbona voeur dì propri …bbona. La Pasqua l’è ona festa cristiana ed ebraica, bona (pron. buna) l’è on aggettiv stampàa in la cartolina pasqual che anca se la vegniva da Vidigulf la gh’aveva insema ai auguri do simbol important: el Signor e l’agnel. Adess che i agnel hinn stà requisì dal Berlusca e dalla Boldrini el Signor l’è restà de per lu. Meno mal che han minga pensà de regalagh el turbant. Ma la va da pocch che ghe mettaran in co’ el cappel de mandarin e coi cavej long ghe faran la coa. La cartolina pasqual la diseva “augùr de Bona Pasqua” et la se riceveva ona settimana prima della Resurrezion. Adess devom contentass della telefonada all’ultim moment, o pesg, la sera o el dì dopo. Num la Bona Pasqua la demm incoeu, domenega. Doman l’è giamo’ pasquetta e tutti metten l’erba sul palchè per fa on “dejeuner” come se dev e se inviden cont el computer. E allora Bona Pasqua a tucc queij che hinn memorizzàa su la mailing list. Bona Pasqua ai fioeu ai adult ai adultissim che se manden i auguri sul cellular cont i faccitt che sorriden, piangen o hinn neutri.

Bona Pasqua a quei donn col vel vegnu foera, senza, da on Supermercàa, a quij turc, indian, arab, cines, che portaven scòrb pien de oeuv e de colomb. Ma se adatten ai noster usanz domà per i fest, i gioeugh, el mangià o el ciccolatt le metten denter i Kebabb? Bona Pasqua ai vegan e ai vegetarian che san no che agnell e cavret eren sacrificà al post di Vergin e che mangiaj l’è minga peccàa e che l’è pussè peccàa massà la gent, fa i guèrr, maltrattà i fioeu, i donn, torturà i presonnee, fa’ negàa i migrant e via coi terremotà lassà in de per lor…

E per finilla… Bona Pasqua a tutti i amis che leggen Il Giorno, el canton de Milan (l’Angolo di Milano). Quaivun (Renato Dal Compare – Tony Martucci – Alberto Patrucco – Guido Veronesi- Angelo Favro) el me telefona per famm i compliment. Bona Pasqua a tucc queij che se domanden “ma come, l’è ancamò viv?”.

E bona Pasqua e bona salud a Lino Patruno e Nanni Svampa. Ghe foo i auguri de pronta rimessa sora el palch scènich. Come a lor a la mia amisa Dea D’Aprile, al Gerardo Paganini, a la ca’ de ripos Redaelli de Vimodron, e a tucc quij che disen de voeurem ben. Auguri a la Grazia Maria Raimondi, reggiora e compagna d’art, a mia sorella Maria ex annunziadora RaiTV, ai me fioeu Fabrizio, Matteo, Federika, ai me biadegh (nipoti) Andrea, Angelica, Maria Vittoria, Carola, ai do zio Frank, a quei comprimari che fan la part de la miè o del mari, di suocer o di cugnàa… Ve spieghi, tutta ‘sta nomenclatura. A hinn i titol de coa dell’articol-trasmission. Ormai tucc metten tucc e mi gh’hoo de lassà indrè on quaivun? Domà che sul giornal ti e podet legg, inveci in di programm TV te fet minga a temp perchè el rullo el taca a cor tanto che se impasten tucc, compres el nomm de chi el gh’ha mis i danè per la sponsorizzazion.

E giusta per finì auguri al direttor Sandro Neri e al so’ capp redattor central Ivano Costa perché me daghen i caratter de tirà a man la parrucchera che per ona pettenada fada da ona soa lavorante l’ha pagà la multa a on controlloeur perché la gh’aveva minga battù el scontrin de cassa appont perché l’era la padrona e l’era minga obbligada a pagass el cont. Bona Pasqua a la cinesada del Milan. Sont invidios. Quand hann vendù l’Inter gh’hè minga stà tanto baccan. Mah! semm a Milan, il calcio l’è cines, i ristorant hinn cines e giapppones, la moda la se sposta de là per via della mano d’opera, spettom domà che comperen el Domm, la Scala, la Montagnetta de S. Sir, e che cambien el nomm a la città : Milanchino. Bona Pasqua a Trump ch’el tira la Mader de tutti i bomb (morta lèe sperem che moeuren anca tucc i so fioeu dato che poden pu ciuccià a la soa tetta). Donald el spetta che la Cina la se moeuva contra la Corea. Attenti, l’Italia ne sa on quaicoss. Bona Pasqua anca a lor e a tucc i lettor del Giorno, semper pussè bell e pussè complett. Bona Pasqua dal sviolinator.